У падмаскоўным Фразіне (РФ) загарэўся будынак навукова-даследчага інстытута «Платан». Загінула як мінімум восем чалавек, тэлеграм-каналы публікуюць відэа з чалавекам, які выскачыў з акна.
Губернатар Маскоўскай вобласці Андрэй Вараб’ёў паведаміў, што пажар увечары 24 чэрвеня ахапіў некалькі паверхаў дзевяціпавярховага будынка, яму прысвоены трэці ранг складанасці. На месцы здарэння працуюць разлікі МНС і 16 брыгадаў хуткай дапамогі.
У МНС РФ ацанілі плошчу пажару ў 4500 метраў, тушыць яго адправілі два верталёты. Агонь ахапіў з 5-га па 8-ы паверх, працу пажарных ускладняюць высокая тэмпература і густы дым.
Ахвярамі пажару, паводле папярэдніх звестак, сталі восем чалавек, паведамляе ТАСС са спасылкай на аператыўныя службы.
Пры гэтым тэлеграм-канал Mash са спасылкай на свае крыніцы піша пра дзевяць загінулых. Паводле яго інфармацыі, двое вываліліся з 6-га і 7-га паверхаў, яшчэ сямёра задыхнуліся чадным газам або згарэлі.
Паводле Андрэя Вараб’ёва, ратавальнікам удалося эвакуяваць аднаго чалавека, але ў будынку могуць знаходзіцца яшчэ некалькі чалавек.
Адзін з пацярпелых — 34-гадовы мужчына — знаходзіцца ў цяжкім стане ў рэанімацыі, яго падключылі да ШВЛ. Двое пажарных звярнуліся па медыцынскую дапамогу праз атручанне прадуктамі гарэння, але пагрозы іх жыццю няма.
Тым часам СМІ публікуюць кадры, на якіх адзін з заблакаваных на верхніх паверхах людзей скача з акна. Іншыя выбіваюць шыбы.
Папярэдне, пажар пачаўся праз газавы балон. Распачатая крымінальная справа па артыкуле «Прычыненне смерці па неасцярожнасці».
У «Расэлектроніцы» заявілі, што будынак не мае дачынення да абароннай прамысловасці.
«Будынак, які гарыць, не мае дачынення да нашай арганізацыі і ў цэлым да абароннай прамысловасці. У канцы 90-х гадоў ёг перайшоў у прыватную ўласнасць», — сцвярджаюць у арганізацыі.
Аднак, паводле звестак са СПАРКа, юрыдычная асоба НДІ «Платан» размяшчалася па адрасе Заводскі праезд, дом 2, як мінімум да канца 2023 года. Пасля гэтага адрас змянілі на тэрыторыю Усходнюю Заводскую прамысловую, дом 16 — гэта суседні будынак, пішуць «Важные истории».
НДІ «Платан» займаўся вытворчасцю электронных дэталяў і радыёкампанентаў, якія выкарыстоўваюцца ў абароннай прамысловасці. Паводле звестак са СПАРКа, «Платан» заключаў некалькі кантрактаў з Мінабароны Расіі на пастаўку электронна-прамянёвых прыбораў.