У сеціве ў пятніцу, 23 снежня, з’явілася інфармацыя, што грузінскі банк Bank of Georgia закрывае рахункі кліентам з Беларусі і Расіі. У паведамленнях гаворыцца, што блакаванне адбудзецца цягам пяці дзён. Пазней стала вядома, што апавяшчэнні пра закрыццё рахункаў атрымалі таксама кліенты з іншых краін.
«Bank of Georgia масава закрывае рахункі расіянам і беларусам без тлумачэння прычын. Банк разаслаў кліентам паведамленні, у якіх гаворыцца, што на вывад сродкаў ім даецца 5 дзён, потым рахунак будзе заблакаваны», — паведаміў тэлеграм-канал «Банки, деньги, два офшора».
Пазней з’явілася інфармацыя, што пад блакаванне трапляюць таксама рахункі грузінаў і ўкраінцаў, але такіх выпадкаў нашмат менш, перадае тэлеграм-канал «Привет из Батуми». Пры гэтым адной з версій магчымага блакавання рахункаў называецца купля крыптавалюты праз спецыяльныя сэрвісы P2P з наступным пераводам грошай на банкаўскія рахункі. У дадзеным выпадку — у Bank of Georgia. Але ёсць выпадкі, калі паведамленні пра блізкае закрыццё рахункаў атрымлівалі і тыя кліенты гэтай фінустановы, якія не займаліся пераводамі сродкаў з купляй крыптавалюты.
У кантакт-цэнтры Bank of Georgia журналісту «Люстэрка» як фізасобе паведамілі, што рахунак будзе выдалены толькі ў тых кліентаў, якія атрымалі адпаведнае паведамленне. Пры гэтым спецыяліст не пацвердзіў інфармацыю пра тое, што блакаванне датычыць толькі беларусаў і расіян.
Некалькі беларусаў, якія карыстаюцца паслугамі Bank of Georgia, расказалі «Люстэрку», што не атрымлівалі паведамленняў пра закрыццё рахунку.