Урад уводзіць змяненні па рэгуляванні цэн на тавары. Адно з асноўных — прыкладна на траціну скарацілі спіс пазіцый, якія пад яго падпадаюць. Значная частка з іх — харчовыя пазіцыі. «Люстэрка» вывучыла пастанову Саўміна і расказвае, якія прадукты пакінулі пад дзяржрэгуляваннем, а якія — вывелі з-пад яго. Нагадаем, раней эксперты папярэджвалі, што паслабленне кантролю цэн можа справакаваць іх прыкметны скачок.
Колькі прадуктаў пакінулі пад дзяржрэгуляваннем
Чыноўнікі зрэзалі спіс тавараў, цэны якіх будуць кантраляваць, — з 331 да 211 пазіцый. «Скарачэнне пераліку пры гэтым грунтавалася на неабходнасці падтрымання ўзроўню інфляцыі і выключэння з цэнавага рэгулявання тавараў непаўсядзённага попыту або прэміум-класа», — так растлумачылі новаўвядзенне ва ўрадзе.
Спіс харчовых тавараў, цэны на якія чыноўнікі па-ранейшаму будуць кантраляваць, доўгі. У ім — 80 пунктаў, прычым у некаторых з іх па некалькі тавараў. Раней у гэтым спісе было 124 пазіцыі.
Якая сітуацыя з мясам, малочнымі прадуктамі і рыбай
Што да мясных прадуктаў, то вывелі з дзяржрэгулявання мясныя катлеты, сала, піражкі, блінчыкі, чабурэкі, беляшы, галубцы з мясам, вэнджаныя прадукты са свініны, мяса птушкі. Пры гэтым у пастанове ўрада засталося нямала пазіцый. Да прыкладу, ялавічына і свініна ў тушах, паўтушах і адрэзах, мясны фарш (акрамя ялавічнага), мясныя харчовыя субпрадукты, мяса (тушка) курэй, куранят (уключаючы бройлераў), пельмені, варэнікі, равіёлі, мясныя падушачкі.
З малочных прадуктаў прыбралі вяршкі з каровінага малака, тварогавы крэм, дэсерт, пудынг, пасту, паўфабрыкаты з тварагу (варэнікі, блінчыкі). А вось цэны на малако, кефір, смятану, тварог і глазураваныя сыркі па-ранейшаму будуць пад кантролем чыноўнікаў.
З сыроў у пастанове Саўміна засталіся цвёрдыя і паўцвёрдыя з каровінага малака (акрамя плесневых, вэнджаных і цёртых). Мяккія сыры (у тым ліку тварожныя), а таксама плаўленыя і расольныя вывелі з-пад дзяржрэгулявання.
Што да рыбы, то па ёй змяненняў не ўводзяць. Па-ранейшаму пад дзяржрэгуляванне падпадаюць жывая і астуджаная неразабраная, марожаная неразабраная, марожаная, а таксама салёная і вострага пасолу. Ва ўсіх выпадках ёсць выключэнне — ласосевыя, асятровыя і тунцовыя пароды.
Навіны для ласуноў
Вывелі з-пад дзяржрэгулявання сухары, сушкі, абаранкі, кукурузныя шматкі, гарох, мюслі, тарты, пірожныя, халву, какава-парашок.
Па-ранейшаму засталіся ў пастанове ўрада вафлі, пернікі, печыва, мучныя прысмакі, ірыс, карамель, глазураваныя шакаладнай і тлушчавай глазурай цукеркі, шакалад, мармелад, зефір, пасціла, кандытарскія вырабы без цукру. То-бок цэны на гэтыя пазіцыі працягнуць кантраляваць.
Якая сітуацыя з гароднінай і садавіной
З пастановы ўрада выключылі свежыя баклажаны, зялёную цыбулю, кроп, пятрушку, салаты, свежыя салатныя сумесі, радыску, замарожаную гародніну і агароднінавыя сумесі.
Улады па-ранейшаму будуць сачыць за цэнамі на рэпчатую цыбулю, свежыя сталовыя буракі, моркву і бульбу (акрамя мытых), свежыя белакачанную капусту, агуркі, таматы, перац і часнок.
З садавіны пад дзяржрэгуляваннем засталіся свежыя яблыкі, грушы, вінаград, цытрусавыя плады і бананы. Не будуць чыноўнікі сачыць за цэнамі на свежыя ківі, персікі, нектарыны, хурму.
Цэны замарожаных садавіны, ягад і фруктова-ягадных сумесяў, арэхаў у шкарлупіне і сухафруктаў улады не збіраюцца кантраляваць.
Што застаецца пад дзяржрэгуляваннем
Сярод іншага ўлады будуць кантраляваць цэны на курыныя яйкі, цукар, харчовую соль, чай (акрамя фітачаёў і чайных напояў), растваральную і молатую каву (за выключэннем той, што ў капсулах).
А яшчэ — на хлеб, аўсянку, кашы для дзіцячага і дыетычнага харчавання, некаторую макарону (але прыбралі з-пад рэгулявання макарону хуткага прыгатавання), харчовую соду і спіртавы воцат. Таксама кантраляваць цэны па-ранейшаму будуць на грэчку, пярлоўку, проса (выключэнне — кашы ў варачных пакетах).
Пад кантролем чыноўнікаў застануцца таксама цэны на рыс. Але ўрад дадаў выключэнні — не толькі ў варачных пакетах, але таксама гатункі «жасмін» і «басмаці».
Дарэчы, таксама вывелі з-пад дзяржрэгулявання квас, маянэз, харчовую гарчыцу, бульбяныя чыпсы, таматны соус, кетчуп.
Чытайце таксама
