Трафік відэахостынгу YouTube у Расіі знізіўся да 20% ад нормы, сэрвіс там «дэ-факта заблакаваны», сцвярджае кіраўнік арганізацыі «Общество защиты интернета» Міхаіл Клімароў. Дырэктар беларускага правайдара hoster.by Сяргей Павалішаў расказаў Tochka.by, ці магчыма замяніць платформу ў Беларусі.
Расійскі IT-спецыяліст Міхаіл Клімароў на падставе звестак сэрвісу маніторынгу Google 23 снежня заявіў, што «YouTube дэ-факта заблакаваны ў РФ».
«Цяпер сэрвіс маніторынгу Google паказвае 8,5 пойнтаў трафіку з РФ. Да „запаволення“ гэта было 40 пойнтаў. То-бок цяпер прыкладна 20% ад нармальнага стану», — напісаў ён.
Паводле яго, гаворка ідзе пра «самае сапраўднае блакаванне» відэахостынгу на тэрыторыі Расіі.
Дырэктар hoster.by Сяргей Павалішаў падзяліўся меркаваннем, ці магчыма замяніць платформу ў нашай краіне і чаго чакаць беларусам, калі YouTube з нейкіх прычын перастане працаваць у нас.
«На сённяшні дзень годнай альтэрнатывы YouTube я не бачу. Больш за тое, на маю думку, у агляднай будучыні ў Беларусі нерэальна неяк паўтарыць поспех YouTube. Усё ўпіраецца ў распрацоўку: такія праекты не робяцца за месяцы, такія праекты робяцца гады, а можа, і дзесяцігоддзі», — адзначае дырэктар hoster.by.
Паводле яго, не менш важнае пытанне — папулярызацыя «беларускага аналага YouTube», бо нікому не патрэбная пляцоўка, на якую «ходзяць» некалькі дзясяткаў чалавек на дзень.
«Гэта сапраўды мусіць быць народная любоў, народная папулярнасць. Каб рэсурс меў давер, каб людзі самі хацелі туды заходзіць», — разважае Павалішаў.
Ён адзначыў, што ў Расіі сітуацыя адрозніваецца ад беларускай: там ёсць VK Відэа, RuTube, аднак у нашым выпадку альтэрнатываў YouTube няма.
«У Беларусі людзі масава карыстаюцца YouTube. Спадзяюся, і працягнуць карыстацца ў будучыні», — рэзюмуе ён.
Нагадаем, у Беларусі 12 верасня 2024 года запрацаваў свой «аналаг» YouTube. Ва ўсялякім выпадку, так сэрвіс videobel.by прэзентавалі прапагандысцкія рэсурсы.
У адрозненне ад YouTube, у videobel.by няма карыстальніцкага кантэнту, то-бок магчымасці ствараць свае каналы. Замест іх на videobel.by прадстаўленыя відэаматэрыялы галоўных прапагандысцкіх рэсурсаў — тэлеканалаў «Беларусь 1», АНТ, СТБ, «РТР-Беларусь» і «Мир», а таксама інфармагенцтва БЕЛТА і газеты «СБ. Беларусь сегодня».
Чытайце таксама
